د امریکا د خلايي تحقیق ادارې (ناسا)، د اروپا د خلايي څېړنو ادارې (ایسا) او د کاناډا د خلايي څېړنو مرکز د جولای پر ۱۲مه د جېمز ویب په نوم له لوی خلايي دوربینه اخیستل شوي انځورونه خپاره کړي دي. هغو ادارو جېمز ویب دوربین د ۲۰۲۱ز کال د ډېسېمبر په اخري اوونۍ کې خلا ته لېږدولی وو چې اوسمهال د ناسا په وینا، له ځمکې څخه شاوخوا ۱.۵ مېلیونه کېلومیټره لیرې دی. هغو ادارو له دوربینه تازه اخیستل شوي انځورونه خپاره کړي دي چې کیفیت یې خورا ښه دی. ناسا وايي، انځورونه د کاینات د هغو برخو دي چې له ځمکې څخه شاوخوا ۷،۶۰۰ نوري کاله لیرې دي. د ستورپېژندنې یا فلکیاتو نړیواله ټولنه وايي چې یو نوري کال هغه واټن یا فاصلې ته ویل کېږي چې رڼا یا نور یې په خلا کې د ځمکې د یو کال په موده کې وهي. د نور رفتار څه د پاسه ۲۹۹.۷ مېلیونه میټره في ثانیه (سېکنډ) دی. ساینسپوهان وايي، دا نادره انځورونه ورسره د کاینات پوهنې او د طبیعیاتو (فېزیک) د نظریاتو او قوانینو په پوهاوي، څېړنو او ثابتولو کې مرسته کوي. د رویټرز اژانس له ویډیو جوړ رپورټ.
