اوکراینی پوځ د روسیې د نویو بریدونو شنډولو لپاره د تیارۍ په حال کې دی
د اوکراین پوځ وايي، چې د دې هېواد د دوهم لوی ښار خارکییف په شاوخوا کې د روسي ځواکونو د حملو د شنډولو عملیات د پیاوړي کېدو په حال کې دي.
د اوکراین د کورنیوچارو وزارت سلاکار وادیم دیني سینکو وايي، که څه هم نن سهار وختي په خارکییف ښار کې د روسي الوتکو د هوايي حملو اړوند د خبرتیا زنګونه کړنګېدل خو د ده په وینا اوکرایني پوځیانو په شمالي جبهه کې پرمختګ کړی او حتی د روسیې سرحد ته نږدې شوي دي.
د اوکراین ولسمشر ولودیمیرزیلینسکي پرون ناوخته په یوه وینا کې وویل، چې د دې هېواد پوځ په دونباس سیمه کې د روسیې د نویو حملو د شنډولو لپاره د تیارۍ په حال کې دی.
زیلینسکي زیاته کړه، اشغالګران لاهم نه غواړي دا ومني چې پر هغه سړک روان دي چې د بېرته راستنېدو لار نه لري.
د اوکراین د ولسمشر یوه مرستیال اولیکسي اریستو ویچ ویلي، د اوکراین د پوځ له دفاعي اقداماتو وروسته روسيې خپل ځواکونه له خارکییف څخه ایستلي او دونباس ته یې استولي.
نوموړی زیاتوي، هغه سرتېري چې په شاتګ یې کړی، په ختیځ کې د لوهانسک خوا ته استول شوي دي.
په همدې حال کې د ناټو عمومي منشي یینس ستولتینبیرګ ویلي، چې دا جګړه هسې چې روسیې غوښتل پرمخ نه ځي.
ستولتینبیرګ پرون د دې ټلوالې له جګپوړو ډیپلوماتانو سره په برلین کې د کتنې پرمهال وویل اوکراین دا جګړه ګټلی شي او د ناټو غړي باید د کییف پوځي ملاتړ ته دوام ورکړي.
له بلې خوا ناټو په پام کې لري چې نن ناوخته په استونیا کې پوځي تمرینات پیل کړي.
دا د ناټو تر ټولو پراخ تمرینات دي چې دوه اونۍ به دوام وکړي او د فنلنډ او سویډن په ګډون چې د ناټو غړي نه دي د لسو هېوادونو ۱۵ زره سرتېري به ګډون په کې وکړي.
فنلنډ او سویډن پر اوکراین د روسیې له یرغل وروسته د یوه تاریخي اقدام په ترڅ کې پرون تایید کړه، چې غواړي د ناټو غړیتوب ترلاسه کړي.
همداراز د اروپايي ټولنې د ۲۷ غړو هېوادونو د بهرنیوچارو وزیران به نن په بروکسل کې په خپله غونډه کې د اوکراین د وضعیت او پر روسیې د بندیزونو په اړه بحث وکړي.
د اوکراین د بهرنیوچارو وزیر دیمیتري کولیبا به هم په دې غونډه کې حاضر وي.