له افغانستانه د افغانانو د وتلو په اړه د طالبانو د حکومت تازه درېځ
نوموړي نن په خپله ټویټرپاڼه کې لیکلي چې د ده د خبرو مطلب دا وو چې هغه افغانان چې اسناد نه لري، او بهر ته په غیر اصولي او قاچاقي ډول تګ چې هېواد وال له خطر سره مخامخ کوي منعه دي.
ښاغلی مجاهد دغه څرګندونې وروسته له هغې کوي چې د امریکا متحدو ایالاتونو او بریتانیا بهر ته د افغانانو د تګ په اړه د نویو محدودیتونو په اړه د نوموړي د تېرې یکشنبې د ورځې پر څرګندونو اندېښنه ښودلې او ویلي ېې دي چې ښایي هغه له افغانستانه د یو شمېر کسانو د ایستلو لپاره د دوی روانې هڅې له خڼد سره مخامخ کړي.
د رویترز خبري اژانس د راپور له مخې ښاغلي مجاهد په کابل کې په یوه خبري کنفرانس کې وویل چې افغانان پرته له کوم عذره د تګ اجازه نه لري او ښځې هم نه شې کولای له شرعي محرم پرته له هېواده بهر سفر وکړي.
د افغانستان لپاره د بریتانیا شارزدافیر هوګو شورټر پرون دوشنبې په یوه ټویټ کې ولیکل چې د طالبانو له خوا پر ازاد تګ راتګ دغه محدودیتونه ورته د نه منلو دي.
نوموړي له طالبانو غوښتي و چې سمدستي دې د خپلو څرګندونو وضاحت ورکړي.
د امریکا د بهرنیو چارو وزارت یوه ویاند پرون ناوخته وویل چې د طالبانو څرګندونې یې چې په رسنیو کې خپرې شوې لیدلي او په دې اړه یې خپلې اندېښنې له طالبانو سره شریکې کړي دي.
دغه ویاند زیاته کړې چې زموږ د افغان متحدینو د ایستلو لپاره زموږ امکانات په دې پورې تړلي چې طالبان له افغانستانه په ازادانه توګه د خلکو د وتلو په اړه پرخپلو ژمنو عمل کوي که نه.
خو د طالبانو د حکومت ویاند ذبیح الله مجاهد په خپل ننني ټویټ کې د دغو اندېښنو په اړه دا هم ویلي چې هغه هېواد وال چې قانوني اسناد یا دعوت نامې ورسره وي، کولای شي له هېواده بهر سفر وکړي او هم په ډاډمن ډول بېرته خپل هېواد ته را ستانه شي.
خو ښاغلي مجاهد له شرعي محرم پرته بهر د ښځو پرسفر د محدودیت لګولو په اړه څه نه دي ويلي.
د رویترز په وینا تر اوسه نه ده څرګنده چې بهر ته پر افغانانو د سفر په اړه دغه نوي محدودیتونه به د یو شمېر هېوادونو او نړیوالو سازمانونو هغه هڅې چې په ترڅ کې یې غواړي له افغانستانه په زرګونو کسان وباسي، له خنډ سره مخامخې کړي.
دا هغه کسان دي چې په تېرو نږدې ۲۰ کلنو کې د بهرنیو هېوادونو له سفارتونو، پوځونو او پروژو سره کار کړی او په لوېدیځو هېوادونو کې د پناه اخیستو مستحق پېژندل شوي خو تر اوسه په افغانستان کې پاتې دي.