اروپایي ټولنه: افغانستان ته مو د مرستو ۱۰مه بسته ورسېده
د اروپايي ټولنې د مرستې دا جوپه د هوايي دهلېز له لارې افغانستان ته استول شوې ده.
د بحران په چارو کې د اروپايي ټولنې کمېشنرې نز لینار چیچ بېګا پر ټویټر ولیکل چې په دې بسته کې ۲۸۰ ټنه خواړه، درمل او د 'کووېډ-۱۹' ناروغۍ د علاج اړوند تجهیزات شامل دي.
مېرمن لینارچیچ زیاتوي چې اروپايي ټولنه به تل د افغانانو ترڅنګ ودرېږي.
له دې مخکې نړیوال بانک له افغانستان سره د مرستې د صندوق له کنګل شویو پیسو څخه د ۲۸۰ ملیون ډالرو د ازادولو خبر ورکړ.
تمه ده چې دا پیسې به د خوړو د نړیوال پروګرام (ډبلیو اېف پي) او د ملګرو ملتونو د ماشوم د مرستې صندوق یونېسف ته ورکړل شي.
ملګرو ملتونو ویلي چې افغانستان د ژور بشري بحران له ګواښ سره مخامخ دی او اقتصاد یې د سقوط پر مورګه ولاړ دی.