یوه روسي چارواکي دغه هېواد کې د کرونا د نوې بڼې د پېژندلو خبر ورکړ

په روسیه کې د کرونا ویروس له کبله په بې ساري ډول د مړینو د شمېر له زیاتېدو سره په یو وخت د دغه هېواد یوه روغتیايي چارواکي پرون پنجشنبه (د تلې ۲۹مه) د کرونا د یوې نوې بڼې د پېژندل کېدو خبر ورکړ چې تر ډېلتا بڼې هم ژر خپرېږي. 


د روسي رسنیو د راپور له مخې، د روسیې د عامې روغتیا یوه جګپوړي متخصص کامل حافظ اوف وویل، احتمال شته د دې نوې بڼې کرونا د خپرېدو سرعت خورا زیات وي. 


د ده په وینا، د کرونا دا نوې بڼه په دې وېروس د اخته کېدونکو کسانو شمېر د پام وړ زیاتولی شي او دا احتمال شته چې د ډیلټا ځای ونیسي. 


په روسیه کې څه باندې ۲۲۷ زره تنه له کرونا وبا مړه شوي چې د اروپايي هېوادونو په منځ کې تر ټولو ډېر دي.