پاکستان د سپین بولدک ـ چمن بندر د راکړې ورکړې پر مخ پرانیست
د افغانستان د مالیې وزارت ویاند شمعروز خان مسجدي نن ازادي راډيو ته وویل دا لاره یوازې د دغو دوو هېوادونو د خوراکي توکو صادراتو او واردتو لپاره پرانیستل شوې ده.
هغه زیاته کړه: "نن سهار اته بجې د وارداتو لړۍ پیل شوه، تر دې دمه د خوراکي توکو له ۶۰ زیاتو لارۍ افغانستان خوا را اوښتي دي، زموږ د معلوماتو له مخې د ډیورنډ فرضي کرښې هاخوا دا مهال د خوراکي توکو له ۲۰۰۰ زیاتې نورې لارۍ هم افغانستان ته د خوراکي توکو د انتقال انتظار باسي."
د افغانستان د مالیې وزارت وایي دا اقدام له هغه وروسته وشو چې د دغه وزارت سرپرست محمد همایون قیومي له پاکستاني چارواکو سره خبرې وکړې او د دغه بندر د پرانېستې غوښتنه یې وکړه.
د دغه وزارت ویاند دا هم وویل چې د غلام خان او تورخم بندرونو د پرانېستلو لپاره هم له پاکستاني چارواکو سره خبرې اترې روانې دي.
دا په داسې حال کې ده چې تېره اونۍ د کرونا ویروس د خپرېدو د وېرې پاکستان د افغانستان پر مخ خپل بندرونه وتړل.