امریکا: د یوې بریتانوۍ کښتۍ پر وړاندې د ایران خنډ غندو
د بهرنیو چارو وزارت ویاندې مورګان اورتاګوس «Morgan Ortagus» پرون- پنجشنبې په واشنګټن کې په یوه خبري غونډه کې همدا راز په هُرمز تنګي کې د یوې بریتانوۍ کښتۍ پر وړاندې د خنډ جوړولو له کبله د ایران سپاه پاسداران ځواک وغانده: "د امریکا د بهرنیو چارو وزارت د ایران د سپاه پاسداران انقلاب د سمندري ځواک هغه هڅه غندي چې د بریتانوي میراث په نوم د بریتانیا د بیرغ لرونکې تجارتي کښتۍ یې غیرقانوني ګواښلې او د هغې تېرېدو ته یې په هُرمز تنګي کې مزاحمت کړی."
بریتانیا پرون اعلان وکړ چې سمندري ځواکونو یې د ایران د هغو درېیو کښتیو مخه نیولې چې په هُرمز تنګي کې یې د یوې بریتانوۍ تجارتي کښتۍ لاره نیولې وه.
د ایران د بهرنیو چارو وزیر محمدجواد ظریف د بریتانوۍ کښتۍ ګواښل یوه بې ارزښته ادعا بللې او رد یې کړه.