د امریکا یوه لوړ پوړې چارواکې پر ایران د فشار د زیاتولو هڅه کوي
سیګال منډلیکر چې د ترهګرۍ او مالي استخباراتو په برخه کې د امریکا د خزانې وزارت مرستیاله ده، د جمعې په ورځ یې په سنګاپور کې وویل، هغه به په دې اوونۍ کې په مالیزیا، سنګاپور او هندوستان کې په خپلو راتلونکو لیدنو کې پر هغو خطرونو ټینګار وکړي چې له تهران سره په راکړې ورکړې پورې تړلي دي.
نوموړې ویلي:
"دا ډېره مهمه ده، دا هېوادونه په بېلابېلو بڼو مهمې لارې لري چې د ایران رژیم کولی شي چې د خپلو تېلو د استولو په تړاو ترې د نړېوالې ټولنې په تېر ایستلو ګټه واخلي."
نوموړې وویل، د امریکا اداره صفر ته د ایران د تېلو د صادراتو د راکمولو په برخه کې څرګند هدف لري او له واردوونکو یې غواړي چې یا دې له دې هېواده د تېلو پیرودل کم کړي او یا دې د امریکا له بندیزونو سره مخ شي.
واشنګټن ځینو هېوادونو ته لنډمهاله فرصت ورکړی چې له ایرانه د انرژۍ اړوند توکو پیرودلو ته دوام ورکړي، څو دا هېوادونه له اقتصادي ګډوډۍ سره مخ نه شي.
دې امریکايي چارواکي زیاته کړې چې دا سفر یې پر ایران د شدید اضافي فشار په تعقیب دی.
د منډلیکر په وینا، تېره اوونۍ دوی د هغو اټمي ساینسپوهانو، ایجنسیو او نورو هغو اشخاصو خلاف اقدام وکړ چې د ایران د رژیم د اټمي وسلو له پخوانیو ادارو او اشخاصو سره ښکېل وو.
واشنګټن د مارچ په ۲۶مه وویل، دوی هغه یوه شبکه ویجاړه کړې چې د ایران سپاه پاسداران ځواک او د دې هېواد د دفاع وزارت ته یې تر یو میلیارد ډالرو زیات انتقال کړي.