په کمبودیا کې ۳،۲ ټنه عاج کشف او ضبط شوي دي

په کمبودیا کې چارواکو له امریکا څخه د ترلاسه شوېو معلوماتو پر بنسټ ۳،۲ ټنه عاج یا د فیلانو غاښونه چې په یوه کانټینر کې ځای پرځای شوي وو، کشف او ضبط کړي دي.


چارواکو ویلي چې دا کانټینر له موزمبیق څخه کمبودیا ته استول شوی و.


د کمبودیا د ګمرک او مالیو یوه چارواکي سن چای نن فرانس پرېس خبري آژانس ته وویل چې دا نژدې ۱۰۲۶ عاجونه په یوه کانټینر کې د مرمر تېږو په مینځ کې په پټه ځای پرځای شوي وو او خاوند یې ظاهراً تښتیدلی دی.


د کمبودیا د ګمرک چارواکي وايي چې په پلازمېنه پنوم پن کې د امریکا سفارت د دې عاجونو په اړه کمبودیايي چارواکو ته معلومات ورکړي وو.