ولسمشر غني په پکتیکا کې له بېلابېلو ځایي قشرونو سره لیدلي
د پکتیکا د والي ویاند محمد الرحمن ایاز ازادي راډیو ته وویل چې ولسمشر غني د ځايي ملکي او امنیتي چارواکو سره په لیدنو سربېره، د قومي مشرانو او د ټولنې له نورو قشرونو سره ولیدل.
نوموړي وویل:
"ولسمشر په پکتیکا ولایت کې له ملکي او امنیتي مسؤلینو سره جلا جلا لیدنې وکړې، د پکتیکا امنیتي وضعيت یې و ارزاوه، د دې ترڅنګ یې د ولایتي شورا له استازو، دیني عالمانو، قومي مخورو، ځوانانو، د پوهنتون له استادانو، د پوهنې ریاست کارکوونکو او ښوونکو سره په جلا جلا ډول وکتل او د هغوی ستونزې یې واورېدې."
ښاغلي ایاز زیاته کړه چې ولسمشر په دې لیدنو کې د پکتیکاوالو د ستونزو د هواري ژمنې وکړې.
ټاکل شوې چې ولسمشر غني به نن دغلته د قومي مشرانو، چارواکو او مدني فعالانو په یوه لویه غونډه کې هم برخه واخلي او وینا به وکړي.