افغانستان د اسیا د کبډي فدراسیون د مرستیالۍ څوکۍ وګټله
د اسیا د کبډي فدراسیون د مشرتابه ټاکلو انتخابات د اندونیزیا په مرکز جاکارتا کې وشول چې د افغانستان د کبډي فدراسیون رئیس احمد فردین ضیايي وتوانېد چې په اکثریتو رأیو سره د اسیا د فدراسیون د مرستیالۍ څوکۍ خپله کړي.
په دغو انتخاباتو کې جانادر سنګ ګهلوت له هندوستانه د دوهم ځل لپاره د ټولو په توافق د اسیا د کبډي فدراسیون عمومي رئیس وټاکل شو.
د اسیا د کبډي فدراسیون د مشرتابه ټاکلو انتخابات په هرو څلورو کلونو کې يوځل کېږي چې دا ځل په کې د شااوخوا دېرشو اسیايي هېوادونو د کبډي فدراسیونو مسؤلینو ګډون کړی و.
دا لومړی ځل دی چې د افغانستان د کبډي فدراسیون کوم مسؤل توانېږي چې د اسیا په کچه دومره لوړه څوکۍ وګټي.
تمه ده چې د اسیا د کبډي د مرستیال په توګه د ښاغلي ضیايي له ټاکل کېدو وروسته په افغانستان کې د کبډي لوبې ته په نړیواله کچه پاملرنه زیاته شي.