ننګرهار چارواکي: تېره اوونۍ ۲۱۵ کیلوګرامه مخدره مواد کشف شوي
د ننګرهار امنیه قوماندانۍ ویاند حضرت حسین مشرقيوال د پنجشنبې په ورځ ازادي راډیو ته وویل چې دا مخدره مواد د ننګرهار پولیسو د بېلابېلو عملیاتو په لړ کې په دُر بابا، بهسودو او سرخ رود ولسوالیو کې نيول شوي دي.
نوموړی وايي:
"په تېره یوه اوونۍ کې شاوخوا ۲۱۵ کیلو ګرامه بېلابېل نشهيي مواد کشف شوي او په تور یې ۵ کسان نیول شوي دي. دا مواد د دُر بابا، بهسودو او سرخ رود ولسوالیو کې د پولیسو لاس ته ورغلي دي. "
د یادولو ده چې د ننګرهار پولیسو له نورو اړوندو ادارو سره په ګډه له نېږدې یوې میاشتې راهیسې پهدې ولایت کې د کوکنارو اړولو کمپاین پیل کړی چې د چارواکو په باور تر دې دمه زرګونه جریبه ځمکه له کوکنارو پاکه شوې او یاد کمپاین اوس هم دوام لري.