چارواکي: په فراه، ارزګان او بلخ کې ۴۹طالبان وژل شوي
د فرا د والي ویاند ناصر مهري وايي، د دې ولایت د بالابلوک ولسوالۍ په ګنج اباد او ګراني سیمو کې د عملیاتو او هوايي بمبارۍ په ترڅ کې شا او خوا دېرش تنه وسله وال وژل شوي او لس تنه نور یې ټپیان دي.
د ښاغلي مهري په وینا دا په دې وروستیو کې په فراه ولایت کې تر ټولو شدید عملیات دي چې د وسله والو خلاف ترسره کېږي.
د سیمې څخه ځینو کسانو ازادي راډیو ته ویلي چې د ګنج اباد په سیمه کې هوايي بمبارۍ لس ملکیان وژلي دي خو امنیتي چارواکي دا ادعا نه تائیدوي.
د یوه بل خبر له مخې په ارزګان کې د امنیه قوماندانۍ د عملیاتو د لومړي کنډک قوماندان زین الله نن ازادي راډیو ته وویل چې د مرکز ترینکوټ په کوټوال سیمه کې تېره شپه د بهرنیو ځواکونو په یو هوايي برید کې ۱۲ وسله وال شول او دوه تنه نور یې ټپیان کړي.
د نوموړي په وینا په وژل شویو کې د طالبانو یو مهم قومندان ملا مبصر هم شامل دی.
په شمال کې بیا د شاهین قل اردو ویاند نصر الله جمشیدي ازادي راډیو ته ویلي چې د بلخ ولایت په چمتال ولسوالۍ کې د ځانګړو عملیاتو په ترڅ کې ۷ طالب وسله وال وژل شوي، ۱۲ ټپیان دي او څلور تنه نیول شوي دي.
په عین حال کې د افغانستان د دفاع وزارت په یوې خبرپاڼې کې ویلي چې په تیرو څلوروېشت ساعتونو کې یې ننګرهار، لغمان، خوست غزني، ارزګان، فراه، هرات، فاریاب، تخار، نیمروز او هلمند ولایتونو کې د تعرضي عملیاتو په ترڅ کې ۴۹ تنه وسله وال وژلي او لسګونه نور یې ټپیا کړي دي.
د افغان چارواکو دا ادعاوې په خپلواکه توګه نه دي تائید شوي.
وسله والو طالبانو هم په دې اړه کومه تبصره نه ده کړې.