Иранските власти денеска соопштија дека егзекутирале едно лице осудено за кривично дело, наводно извршено за време на тековните национални протести во земјата, што е прва таква казна извршена од страна на Исламската Република.
Иранската новинска агенција Мизан ја објави веста за егзекуцијата. Човекот идентификуван како Мохсен Шекари блокирал улица и нападнал припадник на безбедносните сили со мачета во Техеран. Најмалку десетина луѓе досега добија смртни казни поради нивната вмешаност во демонстрациите, велат активистите.
Протестите започнаа по смртта на 22-годишната Махса Амини во септември во полициски притвор. Иранската влада соопшти дека повеќе од 200 луѓе биле убиени во протестите. Иранските групи за човекови права велат дека бројката е повеќе од двојно поголема, додека Обединетите нации соопштија дека повеќе од 300 се убиени додека националните протести еволуирале во еден од најсериозните предизвици за теократијата на земјата од Исламската револуција во 1979 година.
