Почнувајќи од 7 септември, рестораните и баровите во Бугарија ќе треба да затворат во 22 часот, а спортските натпревари во затворен простор ќе се одржуваат без гледачи, соопшти бугарскиот технички министер за здравство Стојко Кацаров додека земјата се подготвува за ново зголемување на бројот на заразени.
„Нема простор за паника. Ситуацијата е сериозна, но не излегува од контрола. Ниската стапка на вакцинација нè принудува да ги воведеме овие мерки”, изјави привремениот министер за здравство Стојко Кацаров. Тој повторно апелираше Бугарите да се вакцинираат.
Претседателските избори во Бугарија ќе се одржат на 14 ноември
Бугарија поради пандемијата ја продолжи вонредната состојба до декември
Според новите ограничувања, што ќе бидат во сила до крајот на октомври, музичките фестивали ќе бидат забранети, а кината и театрите ќе треба да работат со капацитет од 50 проценти. На учениците ќе им биде дозволено да посетуваат настава кога ќе започне учебната година на 15 септември, рече Кацаров, но предупреди дека ако бројот на заразени продолжи да се зголемува, можеби ќе треба да се префрлат на онлајн настава.
Бугарија, која има најмалку вакцинирани граѓани против коронавирус во Европската унија, бележи пораст на заразените во последните недели, главно со многу заразната делта варијанта. За изминатите 24 часа во земјата со седум милиони луѓе регистрирани се околу 1.745 нови случаи и 54 смртни.
