Белорусите се збогуваа со Бандаренка кој почина по претепување од маскирани лица
Очевидци велат дека мажи во цивилна облека го киднапирале Раман Бандаренка на 11 ноември по една расправија на плоштад каде што дошле да ги отстранат црвено-белите ленти што го претставуваат опозициското протестно движење против Александар Лукашенко. Тогаш Министерството за внатрешни работи соопшти дека „непознати лица“ се тепале и кога пристигнала полицијата повикале брза помош да го однесат повредениот Бандаренка во болница. Сведокот рече дека немало брза помош, и наместо тоа, маскираните лица одвеле неколку лица со возила слични на оние што ги користат безбедносните сили.
Повеќе од еден час подоцна, Бандаренка бил примен во одделение за итни случаи со сериозна траума на главата, по што починал.
Свјатлана Циханускаја, лидерка на белоруската опозиција, која избега од земјата поради закани кон неа и нејзиното семејство, го нарече Бандаренка херој.