Чүй облустук милициясынын басма сөз кызматы Токмок шаарынын ички иштер бөлүмүнүн тергөө изоляторунда кармалып турган шектүү өз жанын кыйды деген маалымат берди.
Мекеме “Азаттыкка” билдиргендей, 50 жаштагы шектүү 24-октябрда Кылмыш-жаза кодексинин 158-беренесинин негизинде, жашы жете элек кызга сексуалдык ыдык көрсөтүүгө шек саналып кармалган.
Ошол күнү таңкы саат 4төр чамасы Токмок шаардык милициясынын убактылуу кармоочу жайына киргизилген. Саат "8:45 чамасында ал жалгыз калган камерада өз жанын кыйган".
Окуя боюнча териштирүү иштери жүрүп, 26-октябрда териштирүүдө чогултулган материалдар Чүй облустук милициясына жана облустук прокуратурага өттү. Милиция кызматкерлерине карата кызматтык териштирүү жүрүүдө.
Каза болгон адамдын жакындары, адвокаттары комментарий бере элек.
