Өзбекстандын үч жараны буюртма менен адам өлтүрүү максатында Кыргызстанга мыйзамсыз келгенин 14-октябрда Улуттук коопсуздук мамлекеттик комитети (УКМК) билдирди. Атайын кызматтын маалыматына караганда, "Альфа" түзүмүнүн жоокерлери Ойбек Каримбердиевди, Азамат Рустамовду жана Исламхан Абдулгаффаровду кармады.
Тергөөнүн версиясы боюнча, "мыйзамдагы ууру" делген Камчы Асанбектин (Көлбаевдин) өлүмү үчүн өч алуу максатында "буюртма" алып, аны аткарууга келишкен. Кармалгандар 13-октябрда Өзбекстандын күч органдарына өткөрүлүп берилген.
УКМК 4-октябрда Бишкекте “кримчөйрөнүн анабашы” аталган Камчы Көлбаев (Камчыбек Асанбек) атайын операция маалында өлтүрүлгөнүн ырастаган. Көлбаевди кармоо операциясы ишкерлердин өзгөчө ири өлчөмдө мүлкүн мыйзамсыз тартып алуу фактыларына жана “Дөө” каймана аты бар Чыңгыз Жумагуловду өлтүрүүнү уюштурууга катышы бар деген арыздарга байланыштуу жүргөнүн билдирген.
Атайын кызмат муну улай эле Камчыбек Көлбаев менен байланышта болгон делген 40тан ашык адамды кылмыштуу топтун активдүү мүчөлөрү катары кармаган. Камчы Көлбаевге тийиштүү делген жалпы наркы 1 миллиард долларлык активдер камакка алынганын да билдирген.
Бишкекте, Ошто жана башка аймактарда уюшкан кылмыштуу топторго тиешеси бар делип бир катар жарандар кармалууда. Алардын катарында ишкерлер, курулуш компанияларынын жетекчилери, Чолпон-Ата шаарынын мурдагы мэри жана башка адамдар бар.
