Салык кызматынын Нарын облусундагы райондук башкармалыктын биринин башчысы 12 миң сом пара алып жаткан жеринен кармалды. Бул тууралуу Улуттук коопсуздук комитетинин (УКМК) басма сөз кызматы билдирди.
Кармалган кызмат адамы Ат-Башы райондук башкармалыктын башчысы экенин "Азаттыктын" өздүк булактары ырастады.
Ал күнүмдүк керектелүүчү буюмдарды сатуу менен алектенген жеке ишкерди салыктык чегерүүлөрдү эсептөө, кассалык-көзөмөл машиналарын (ККМ) орнотуу жана колдонууга байланышкан маселелерди анын пайдасына чечип берем деп опузалап, пара талап кылгандыгы аныкталган.
Аталган факт боюнча Кылмыш-жаза кодексинин 343-беренеси (Опузалап пара алуу) боюнча кылмыш иши козголгон.
Жаңы Салык кодексине ылайык, өлкө аймагындагы соода-сатык, жумуш аткаруу, тейлөө субъектилери накталай жана накталай эмес эсептешүүдө милдеттүү түрдө ККМ колдонушу керек. Мындай талап 1-августтан тартып коюла баштайт.
Бир катар ири базарларда иштеген соодагерлер буга карата нааразылыгын билдирип келишүүдө. Алар ККМ колдонсо, товарын кымбаттатууга мажбур болорун айтууда.
Министрлер кабинетинин төрагасы Акылбек Жапаров 13-июнда өкмөт үйүнүн алдына көзөмөл-кассалык аппаратына (ККМ) каршы нааразылык акцияга чыгып, маселени чечүүнүн жолун караштырып чыгарын айткан. (МТа)
