Экс-депутат Садыр Жапаровдун соту 30-апрелге жылды. Мындай чечимди Жогорку соттун соттук коллегиясы өздөрүнө карата адвокаттар ишеним көрсөтпөгөндөн кийин кабыл алды. Алар ишти башка судья алгандан кийин аны изилдөөгө убакыт керек боло турганын айтты.
Отурумдун башталышында саясатчынын адвокаты Шарабадин Токтосунов соттун курамына, төрагалык кылган судьяга ишеним көрсөткөн эмес. Мурдагы ишти да ушул курам караган. Отурумга Садыр Жапаров өзү алынып келген жок.
23-апрелде Жогорку сотто "Ата Мекен" партиясынын лидери, мурдагы депутат Өмүрбек Текебаевдин соту да болот.
Соттук отурумдарга байланыштуу "Ата Мекен" жана Жапаров лидерлик кылган "Мекенчил" партиясынын мүчөлөрү бүгүн митингге чыкты. Алар эки саясатчыны абактан бошотууну соттон талап кылышууда.
Кумтөр маселесине байланыштуу өкмөткө каршы чакырыктары менен чыгып жүргөн Жапаров 2013-жылы «Караколдо митинг уюштуруп, Ысык-Көлдүн ошол кездеги губернатору Эмилбек Каптагаевди барымтага алган» деген айыптын негизинде камалган. 2018-жылы июнь айында экс-депутат 11 жыл, алты айга кесилген. (ErN)
