Situata në kampin Ashraf-3 në Shqipëri dukej e qetë pasditen e 21 qershorit. Një ditë më herët, policia bastisi këtë rezidencë të mijëra disidentëve iranianë, nën dyshimet se disa prej tyre kanë “provokuar luftë” dhe kanë kryer “sulme kibernetike”. Udhëheqës të grupit iranian nuk pranuan të flasin për REL-in, por në një deklarim të mëhershëm për mediat thanë se aksioni i policisë është “sulm kriminal dhe shtypës”. Hyrja në kampin që sigurohet nga një kompani private, nuk lejohet, ndërsa banorët e zonës përreth ndajnë mendime të ndryshme për fqinjët e tyre.
