Бајден го предупреди приватниот сектор на руски сајбер напади
„Ги повикувам нашите партнери од приватниот сектор веднаш да ја зацврстат нивната сајбер-одбрана. Потребно ни е секој да го даде својот придонес за да одговориме на една од дефинитивните закани на нашето време“, рече Бајден.
Американските власти долго време ги обвинуваат руските актери за сајбер напади врз американски поединци, организации и влади, често во акции предводени од Кремљ.
Експертите предупредија за зголемени опасности од таквите напади по руската инвазија врз Украина и остриот одговор на Западот на санкции и воена помош за Киев.
„Ова е критичен момент да ја забрзаме нашата работа за подобрување на домашната сајбер-безбедност и зајакнување на нашата национална отпорност. Претходно предупредив за потенцијалот дека Русија може да спроведе малициозни сајбер активности против Соединетите држави, вклучително и како одговор на невидените економски трошоци што и ги наметнавме на Русија заедно со нашите сојузници и партнери“, додаде тој.
Бајден рече дека федералната влада ќе ги засили одбранбените акции, но ги повика другите да ги зголемат напорите за заштита на критичната инфраструктура.
„Ако веќе не сте го направиле тоа, ги повикувам нашите партнери од приватниот сектор веднаш да ја зајакнат вашата сајбер одбрана со имплементирање на најдобрите практики што ги развивме заедно во текот на минатата година“, рече тој.
Веб-страниците на украинските владини агенции повторно погодени од сајбер напади
Во февруари, неколку веб-страници на украинската влада и веб-страниците на некои украински банки не беа во функција поради, што рече владата во Киев, очигледен сајбер напад од руски актери.
Веб-страниците на парламентот, кабинетот и Министерството за реинтеграција на окупираните територии беа меѓу оние кои беа недостапни. Москва негираше каква било вмешаност.