Имамдар кайрадан аттестациядан өткөрүлөт

Кыргызстанда имамдар кайрадан аттестациядан өткөрүлөт. Бул тууралуу “Азаттык” радиосуна Дин иштери боюнча мамлекеттик комиссиянын директору Зайырбек Эргешов билдирди.


Эргешовдун айтымында, буга чейин мындай аракет 2016-жылы жасалган, бирок имамдардын билим деңгээли өтө эле төмөн болгондуктан аларды адегенде окутуу керек деген чечим кабыл алынган. Үч жылдан бери “Ыйман” фонду менен биргеликте окуу өткөрүлдү.


Эми аттестацияны октябрь айында баштоо пландалып жатат:


- Имамдардын көпчүлүгү аттестациядан өтпөй калат эле. Биз алардын ордуна каяктан алмак элек? Үч жыл аралыгында окутуп даярдадык. Менимче, эми 10-20% гана жооп бере албай калышы мүмкүн.


Эргешовдун айтымында, мыйзам боюнча имамдардын диний жана байистүү (светтик) билими болушу керек. Бирок 2016-жылы аттестация башталганда алардын 80-90% байистүү билими жок экени анык болгон.


“Кээ бирлеринин мектеп деңгээлиндеги да билими жок болчу. Үч жылдан бери биз аларды “Ыйман” фонду менен бирге окуттук.Курандан тышкары мамлекеттик саясат, риторика, “Манас”, каада-салттар деген темаларда окушту” деп кошумчалады Дин комиссиясынын башчысы.


Эргешов окутуу улана берерин, учурда аялдар үчүн тренингдер уюштурулуп жатканын, келечекте башка конфессиялардын өкүлдөрү да окутулуп, диний толеранттуулукту бекемдөө жаатында иш уланарын кошумчалады.


Дин комиссиясынын маалыматына караганда, Кыргызстанда 2647 мечит, 107 медресе, 10 ислам институту бар. Имамдардын саны 2800дүн тегерегинде.


Жалпысынан өлкөдө 3257 диний уюм каттоодон өткөн. Христиан багытындагылардын саны 399, калгандары башка диндердин өкүлдөрү. (RK)