Шәһәрнең төп Яңа ел чыршысы башына менеп йолдыз урлаган мизгел видеога эләккән
Ярославль өлкәсендәге Любим шәһәрендә бер ир-ат Яңа ел чыршысының йолдызын урлап алмакчы була. Бу турыда РЕН ТВ хәбәр итте.
Шәһәрнең төп чыршысын таларга җыенган бу кеше исерек булган. Шулай да ул агачка менү җаен тапкан, чыршының башына ук менеп җитә язган. Карак чыршының башындагы йолдызга үрелә. Шул мизгелдә чыршы селкенә башлый һәм вандал берничә метр биеклектәге агач башыннан егылып төшә.
Бу хәлне күзәтү камерасы төшереп тора. Ир-ат егылып төшкән мизгелдә язма да туктала. Биредәге матбугат чаралары мәгълүматы буенча, Яңа ел чыршысын таларга маташкан кешенең шәхесен ачыклаганнар инде. Аңа җәзага тартулары ихтимал, диелә хәбәрдә.