Сергей Семак «Зенит»га бош мураббий бўлди
«Зенит»нинг янги бош мураббийи Сергей Семак бўлади, у 2016 йилдан буён «Уфа»ни бошқариб келаётганди, бугун уфаликлар у билан шартнома бекор қилингани ҳақида эълон қилишганди.
42 ёшли ушбу мутахассис Санкт-Петербург клуби билан кейинчалик узайтириш шарти кўзда тутилган 2 йиллик шартнома тузган.
Семак «Зенит» сафида 2010-2013 йилларда тўп сурган ва 3 соврин ютиб олган – 2010, 2011/12 йилларда Россия чемпионатида ва 2011 йилда Россия Суперкубогида.
2016 йилгача Семак «Зенит» мураббийлар штабида ишлаган – у Лучано Спалетти ва Андре Виллаш-Боашга ёрдамчилик қилган.
2014 йилда Семак «Зенит»да мураббийлик фаолиятини бошлаганди, у Спалетти кетганидан кейин вақтинча бош мураббийлик вазифасини ҳам бажарган.
Семак раҳбарлигида жамоа 2 ўйин ўтказган – 15 март куни Россия чемпионати доирасида ЦСКА билан ўйинда мағлубият (0:1), 19 март куни ЕЧЛ нимчорак финали жавоб учрашувида Дортмунднинг «Боруссия» клуби устидан ғалаба (2:1).
Роберто Манчинидан кейин «Зенит» бош мураббийлиги учун Семакдан ташқари Марсело Гальярдо, Хорхе Сампаоли, Паулу Фонсека ва Маурицио Сарри номзодлари кўриб чиқилганди. Охирги паллаларда «Зенит» Семакни Сарридан афзал кўрди, италиялик мутахассис эса «Челси»га тайинланиши мумкин.
«Зенит»нинг охирги россиялик мураббийи Анатолий Давидов бўлганди, у клубда 2009 йили ишлаган.