«Яңа кешеләр»дән Дәүләт Думасы депутаты Анна Скрозникова Мәгариф министрлыгына өлкән сыйныфларда укучы кыз балалар өчен физкультура дәресләренә үз-үзеңне яклау нигезләрен өстәү турында тәкъдим белән мөрәҗәгать юллаган. Бу хакта «РИА Новости» хәбәр итә.
Әлеге инициатива «Яңа кешеләр» партиясенең хатын-кызларны үз-үзен якларга өйрәтү буенча «Бить надо первой» проекты кысаларында әзерләнгән.
«Сездән үз компетенциягез кысаларында кызларның үз-үзләрен яклау чаралары комплексын гамәлгә ашыруга ярдәм күрсәтүегезне һәм гомуми белем бирү оешмаларының 10-11 сыйныф укучылары һәм урта һөнәри белем бирү учреждениеләре укучылары өчен физик культура программаларына кертү өчен аерым блок/модуль уйлап табу мөмкинлеген каравыгызны сорыйм», - диелә «РИА Новости» карамагында булган мөрәҗәгатьтә.
Депутат билгеләп үткәнчә, гаилә һәм җәмгыятьтә хатын-кызларга карата көч куллану очраклары арта һәм мөлкәти һәм социаль хәлгә бәйсез рәвештә барлык хатын-кызга кагыла, ә бу мәсьәләдә иң көчсезләр – балигъ булмаганнар.
«Практика күрсәткәнчә, хокук саклаучылар балигъ булмаганнар һәм хатын-кызларны төрле көчләүдән тулысынча саклап кала алмый. Рәхимсез һөҗүм һәм мыскыллаулар корбаны булганнарның күбесе дәшми, чөнки хокук саклау органнарының аларны көчләүдән саклый алуына ышанмый», - дип өсти Скрозникова.
