Татарстанда торак-коммуналь комплекс оешмаларының электр энергиясе өчен түләнмәгән бурычы бер ел эчендә 22 миллион сумга кимегән. 2024 елның 1 маена аларның бурычы 37 миллион сумны тәшкил иткән. Бу хакта Татарстан Республикасы Министрлар Кабинетының 2023/2024 елгы җылыту чоры йомгакларына багышланган утырышында Премьер-министр Алексей Песошин әйтте.
«Кышка әзерлек турыдан-туры халык, оешмалар һәм предприятиеләрнең энергия ресурслары өчен түләүләре белән бәйле. Торак-коммуналь комплекс оешмаларының ягулык-энергетика ресурслары өчен гомуми бурычы 2015 елдан акрынлап кимүгә бара.
Бүгенге көндә коммуналь комплекс оешмаларының газ өчен бурычы 216 миллион сумны тәшкил итә. Бу узган елның шул ук чоры белән чагыштырганда 15 миллион сумга азрак. Торак-коммуналь комплексның барлык оешмаларының электр энергиясе өчен түләнмәгән бурычы бер ел эчендә 22 миллион сумга кимегән. 2024 елның 1 маена бурыч 37 миллион сумны тәшкил итте», – дип сөйләде Татарстан Министрлар Кабинеты башлыгы.
Ул шулай ук торак-коммуналь хезмәтләр өчен халыкның гомуми бурычы күләмен атады – бу 9 миллиард 971 миллион 265 мең сум.
Чарада Татарстан Республикасы Рәисе Рөстәм Миңнеханов һәм Дәүләт Советы Рәисе урынбасары Юрий Камалтынов катнашты, дип хәбәр итә республика җитәкчесенең матбугат хезмәте.