Казанда ике Сабан туена әзерлеккә 29,8 млн сум акча сарыф ителәчәк. Бәйрәмнәрне шәһәрнең Киров һәм Мәскәү, шулай ук Совет районнарында яшәүчеләр өчен уздырырга планлаштыралар. Бу хакта дәүләт сатып алулары порталындагы хәбәрдән билгеле булды.
Чаралар Дәрвишләр торак массивы Каенлыгында һәм Аккош күле территориясендә уза.
Чаралар 25 мең кунакка исәпләнгән булырга тиеш. Концерт программасы милли татар колориты белән 20 минутлык театральләштерелгән кереш өлештән торачак. Үзәк мәйданда кимендә 4 сәгать артистларның чыгышлары дәвам итәчәк, ә программаның гомуми озынлыгы 6 сәгать була. Бәйрәм барышында кимендә 50 номер күрсәтелергә тиеш. Сәхнәгә 10 вокаль ансамбль, 8 хореография халык коллективы, спорт стилендә 4 бию коллективы, кимендә 10 җырчы, шулай ук татар эстрадасының кимендә ике артист чыгачак.
Подрядчыга мәйданнарны әзерләргә кирәк: территорияне җыештырырга һәм тигезләргә, электр, җиһазлар, медицина һәм янгын сүндерү хезмәте белән тәэмин итәргә, трибуналарны һәм сәхнә комплексын ясарга, иминлек чаралары күрергә, пиротехника тәкъдим итәргә. Мәйданчык балалар һәм төп майданнарны үз эченә алырга тиеш, аларда, концерт программасыннан тыш, төрле уеннар һәм конкурслар, шул исәптән традицион «гер күтәрү», «көянтә-чиләк белән йөгерү», «баганага менү», «кашыкка йомырка куеп йөгерү», «капчык белән көрәш», «кул көрәше», милли көрәш һәм башкалар узачак.
Моннан тыш, башкаручыга бәйрәмне техник яктан тәэмин итү һәм кунакларны тукландыру йөкләнә. Килешүне үтәү срогы 2024 елның 31 августына кадәр билгеләнгән. Заказны Казан районнары администрацияләре бирә.
Татарстан Рәисе Рөстәм Миңнеханов республикада Сабантуйны бәйрәм итү көнен раслаган иде. Карар нигезендә Казанда татар халык бәйрәме 23 июньгә планлаштырылган.
