Казан Татарстанны «Киләчәк чәчәкләрдә» күргәзмәсендә тәкъдим итәчәк. Ул Мәскәүдә «Россия» күргәзмә-форумында 21 майдан 8 июльгә кадәр уза. Бу хакта Казан мэриясе хәбәр итә.
Икегә ике зурлыктагы келәм формасындагы экспозиция биш төрле төстәге 381 үсемлектән торачак, ә үзәктә лалә формасында арт-объектлар урнашачак.
Үсемлекләр очраклы сайлап алынмаган — һәр төре Татарстан Республикасының күркәм сыйфатларын чагылдыра. Ә лалә татар орнаментының иң киң таралган элементы буларак композиция үзәге итеп сайланды, дип билгеләп үтте Тышкы төзекләндерү комитеты рәисе урынбасары Альберт Шәйнуров. Арт-объектлар эчтән кызыл диодлы ут белән яктыртылачак.
Концепция Казан үсеш институты тарафыннан эшләнгән, композиция үзәгендә урнашачак арт-объектлар җитештерү белән «Неон-Арт» шөгыльләнә.
«Үсемлекләрнең сортлары татарстанлыларның билгеле бер омтылышларын һәм сыйфатын, республика кыйммәтләрен символлаштыра. Мисал өчен, сары тагетес кунакчыллык, яшел цинерария - бай табигать өчен җавап бирә», - дип сөйләде Казанны үстерү институтының иҗтимагый киңлекләрен үстерү бүлеге архитекторы Эльмира Нәфиева.
