Татарстан Рәисе Рөстәм Миңнеханов Россия Федерациясе дүрт төбәгенең – Татарстан, Башкортостан, Саха (Якутия) Республикасы һәм Чечня Фәннәр академиясе җитәкчеләре белән очрашты. Очрашу ТР Хөкүмәте Йортында узды. Бу турыда Татарстан җитәкчесенең матбугат хезмәте хәбәр итте.
Әңгәмәдә катнашучылар фәнни-техник һәм инновацион өлкәләрдә төбәк фәннәр академияләре арасында хезмәттәшлекне үстерүнең өстенлекле юнәлешләре турында фикер алыштылар. «Безгә төбәкләр Фәннәр академияләре дәрәҗәсендә элемтәдә булу бик ошый, без бергә нәтиҗәле эшлибез», - дип билгеләп үтте Рөстәм Миңнеханов.
Исегезгә төшерәбез, 2023 елның 8 декабрендә Төбәкләр Фәннәр академияләре ассоциациясен булдыру турында килешү имзаланды. Ассоциациянең максаты - җәмгыятьнең фәнни үсешенең гомуми проблемаларын хәл итү, фәнни тикшеренүләр өлкәсендә уртак фәнни проектларны җайга салу һәм гамәлгә ашыру, Фәннәр академияләренең фәнни сәясәтен килештерү, фәнни тикшеренүләрнең иң перспективалы юнәлешләренә ярдәм итү өчен галимнәрнең тырышлыкларын берләштерү.
Бүген Казанда Ассоциациянең киңәйтелгән утырышы узды. Катнашучылар хезмәттәш төбәкләрнең фәнни үзәкләре белән хезмәттәшлек нәтиҗәләрен тәкъдим иттеләр, шулай ук киләчәк эштән ниләр көтүләре турында сөйләделәр.
