Омск өлкәсенең Усть-Ишем районында дамба җимерелгән. Җирле халыкны су баскан авыллардан эвакуациялиләр. Бу хакта Бөтендөнья татар конгрессы хәбәр итә.
Усть-Ишем районында 317 торак йорт һәм 467 йорт яны участогы территориясенә су кергән. Автомобиль юлларының 5 участогында хәрәкәт чикләнгән, 19 торак пунктка юл киселеп калган.
Ишем һәм Иртыш елгаларында су дәрәҗәсе артуын дәвам итә. Кайлы, Усть-Ишем, Әшевән, Кече Игиза, Зур Тибенде, Әбәркүл авыллары аеруча зыян күргән.
Без, Бөтендөнья татар конгрессы, татар дөньясын су басудан зыян күрүчеләргә ярдәм күрсәтергә чакырабыз. Кешеләрнең кайгысына битараф булмаган һәркем түбәндәге реквизитлар буенча ярдәм итә ала. Һәркем бәлагә тарыган кешеләргә ярдәм итүгә үз өлешен кертсен. Без, татарлар, авыр минутларда бер йодрык кебек берләшә беләбез, диелә хәбәрдә.
Реквизитлар Бөтендөнья татар конгрессы сайтында күрсәтелгән.
