"Оьрсийчоьнан турпалхо" цIе тиллина Шемахь вийначу Су-25 тIеман кеманан пилотана Флипов Романна. Хьалхо цуьнан дакъа а, кеманан цхьацца дакъош а дIакхачийнера Подмосковье. Цунах лаьцна хаам бина РБК агенталло, Оьрсийчоьнан тIеман министраллана а, президентан администрацина а тIе а тевжаш. Журналисташкахь болчу хаамца, пилотан дакъа дIаделла Шемарчу тIемалоша, юкъалелаш Туркойчоьнан векалш а болуш. Оьрсийчоьнан тIеман кема чудаийтинера тIемалоша Идлиб провинцехь. Пилот парашютаца чуиккхинера, амма вийра тIемалошца хиллачу тIематасадаларехь.
Дагестанера Iедалан дайх цхьамогIа даржхой лецар тахана уггаре а чIогIа дуьйцучух ду Оьрсийчоьнан хаамийн гIирсашкахь. Оцу хаамо шена тIаьхье битина ала мегар ду Путин Владимиран хинболчу президентан харжамашка ваха пурба делла аьлларг. Оцу харжамех толам боккхург мила хир ву шеко яцахь а нехан, Дагестанехь долийначу «литтарийн» доза мичахь ду хууш дац. Цундела саготта а бу, сатийсаме а бу нах, оцу цхьана махкахь соцура дац иза аьлла. Кхиберш санна лерг диллина ладугIуш бу хуьлчуьнга Дагестанера нохчий а. Читать дальше...
Чиллан-беттан 13-чу дийнахь дуьйна йолах пайда оьцу машенаш йоццачу ханна лело ялар юкъадоккхуш ду Нохчийчохь. Цу хьокъехь йолу церемони хир ю Соьлж-ГIалахь коьртачу маьждигана хьалха, хаам бо chechnyatoday.com сайто. Цу агенталло дийцарехь, цу сервисан цIе ю "Делимобиль". Машен йоццачу ханна лело оьцуш лур долу ахча дагардийр ду хIора минот тидаме оьцуш.
Футболан майданахь а, рингехь а фанаташа кхайкхича а ца тоьаш, дарбанан цIийнехь Деле кхойкхучу меттигехьа а мохь оьху "Ахмат - Сила!", бохуш. Маршо Радион ладогIархоша WhatsAppехула яийтина видео.
СаIудахойн футболисташ Соьлж-ГIала баха дагахь бара, амма цхьана хIумано новкъарло йинчух тера ду царна.
Евкуров Юнус-Бек коьртехь волу гIалгIайн делегаци яхна Катаре, хаам бо Кавказ.Реалиино. Дохерчу аэропортехь цунна дуьхьал веана вара Катаран муниципалан кхиаран а, Iаламан а министр Аль Румейхи Мухьаммад бен Абдалла а, Оьрсийчоьнан цу махкахь волчу векал Холов Нурмахьмад а. ГIалгIайчоьнан куьйгалхочуьнан зорбанан сервисо бинчу хаамца, цу делегацин Iалашо ю Катарехь дIадоьлхучу Оьрсийчоьнан културан денойн дакъа долчу ГIалгIайчоьнан Деношна хьажийначу мероприятешкахь дакъалацар.
Австрехь хIора шарахь дIахьочу «Sag’s multi!» («Шина маттахь ала иза!») цIе йолчу риторикан къовсаман финале яьлла нохчийн кхо йоI. Цу къовсамехь дакъалоцу немцойн мотт ненан мотт боцучу Австрерчу ишколийн дешархоша. Ненан маттахьий, немцойн маттахьий жюрино шайна хьалха ехкинчу теманех цхьа тема схьа а хаьржина, цунах лаьцна говза дийцар ю къовсалучийн Iалашо. ХIора шарахь пхи бIенна тIера эзаре кхаччалца дешархоша дакъалоцу цу къовсамехь. Декъашхой кхаа категорине бекъна бу. Хьалхарчу тобанехь 13-14 шераш долу бераш ду... Читать дальше...
Шелковски кIоштарчу полицин декъе къера хила веана Червленная эвлара 45 шо долу вахархо. Цо дийцарехь, кхушара Дечкен-беттан 29-чу дийнахь шайн эвлахь къола дина хилла цо, нехан хIусаман корехула чу а ваьлла. Зуламхо къера хилла ша дато хIуманаш а, 10 эзар сом ахча а лачкъорна. Цу стага дийцарехь, дато хIуманаш шена а йитина, ахча дайина цо цхьацца шен хьашташна. Полицино дIахьош бу таллам.
Бусалба динца а, мигранташца а гома хиларца гIаръяьллачу немцойн „Германина Алтернатива“, дацдина аьлча, AFD партин регионерчу куьйгалхойх цхьаъ волчу Вагнер Артура бусалба дин тIеэцна. Цуьнан партерчу накъосташна а, цу партин хьежамаш а, леламаш а бевзачарна а юкъахь йоккха гIовгIа яьккхира цу хаамо. Ша Вагнера - цо шена хIинца Ахьмад аьлла бусалба цIе тIеэцна - и шен сацам цхьана юкъана къайленехь битинера. Даханчу шарахь ГIадужу- баттахь дин хийцина волчу цо шуьйрачу юкъараллина ши кIира хьалха бен ца хаийтира иза. Читать дальше...
Цхьаьнатоьхначу Штаташа дIадолийна шайн Иракъехь болчу эскархойн терахь лахдар. Цуьнан бахьана ду меттигерчу Iедалша шаьш "Исламан пачхьалкх" тобанна тIехь толам баьккхина аьлла дIахьедар дина хилар. Иракъан Iедалан векло ал-Хадити Саада бинчу хаамца, Iамеркан эскархой цу махкара арабахар хьалхарчу тIегIантехь а ду, берриг а Iамеркан эскархой арабохур бу бохург а дац иза. Пентагоно стохка Лахьан-баттахь бинчу хаамца, Гезгмашин-бутт чекхболуш Иракъехь дIатарвина вара 8 900 Iамеркан эскархо.
Мьянман дозанца йолчу Бангладешерчу мухIажарийн четарийн гIалахь школа схьайиллина шаьш аьлла, хаам бина Нохчийчоьнан куьйгалхочо Кадыров Рамзана, яздо chechnyatoday.com сайто. Школо лелор ю Кадыров Ахьмад-Хьаьжин цIе. Кадыровс бинчу хаамца, цу школехь деша аьтто бу цхьа эзар гергга берийн. Цо дийцарехь, дешаран процес дIайолаелла, хьехархошна луш ду алапа.
Бохам хиллера 2017-чу шарахь Марсхьокху-баттахь Гази-юьртана гергахь. "ВАЗ-21104" машенна урхалла деш хиллачу Нохчийчуьрчу вахархочо галваьлла машен тIетоьхнера дуьхьал йогIучу "ВАЗ -21144" машенна. И бахьана долуш кхо адам дийнера, 29, 55 шераш долу ши зуда а, 36 шо долу стаг а. Кхеле озийначу стага бехк шена тIелацар а, цуьнан жима ши бер хилар а тидаме а эцна, 3 шо колонехь даккха хан тоьхна цунна. Суьдо дихкина цу стагана кхаа шарахь машен лелор.
