Танылган аранжировщик Марат Мухинның хатыны, блогер Гөлия Вәлиәхмәтова социаль челтәрдәге сәхифәсендә күкрәкләрен күтәрттерергә җыенуы турында хәбәр итте. Ул танылган табибтан консультация алганнан соң, язылучыларын операция бәясе белән дә таныштырды.
«Мин сезгә күкрәкләрне күтәрттерү операциясенең бәяләре турында сөйләргә вәгъдә иткән идем. Мин иң яхшы дип санаган хирург бу операцияне 1 млн сумга ясый. Башка яхшы хирургларда бәя 400 мең сумнан башлана. Әмма моңа имплант керми. Монда булганны күтәрттереп кую турында гына сүз бара.
Бүген хирург белән онлайн консультация булды. Ул 5 мең сумга төште. Миңа артык күтәрттерергә кирәкми икән, яки инде минекеләр артык салынып төшмәгән. Консультациядән соң клиника администраторы миңа бәяләрне язып җибәрде. «Сезнең маммопластика 600 мең сум, өстәмә чыгымнар белән 710 мең сум була», – диелгән. 400 мең сумнан башланган бәя 700 мең сумга чыкты. Бик яхшы дигән хирург бәясе белән аерма әллә ни зур булмагач, аннан да консультация алам әле», – дип язган ул.
Ашказанын кечерәйтү операциясе кичергәннән соң, блогер язылучыларының сорауларына җавап биргән иде. «Тирегез асылынып төшсә, операция ясатасызмы?» – дип кызыксынучыга ул: «Юк. Артык тирем юк. Бу – минем элеккеге авырлыгым артык зур булмаганга шулайдыр. Әмма соңрак арт ягымны «ясыйсым» килә. Арт ягының тигез булуын яратмыйм, хатын-кызда да, ир-атларда да. Тик имплант белән түгел, үз маем белән булдырырга тырышачакмын. Күкрәкләрне дә «күтәрттерергә» кирәк булыр инде», – дигән иде.
