Первоуральск шәһәрендә Водоканал җитәкчесе вазифаларын башкаручы Сергей Матафоновны прокуратурада киңәшмә вакытында кулга алганнар. Ул бу вазифага бер атна элек билгеләгән, ә аңа кадәр предприятиенең җитештерү буенча җитәкче урынбасары булып эшләгән. Бу хакта «Новый день» сайты яза.
Водоканалның элекке директоры Артур Гузаиров шәһәрдә су белән тәэмин итү буенча низаглар һәм проблемалар аркасында, Первоуральск шәһәре мэры Игорь Кабец карары белән эштән алынган.
«Гузаиров үз вазифаларын башкара алмады, нәтиҗәдә Первоуральскида су белән тәэмин итү һәм канализация системасында берничә зур авария булды. Безне коммуналь челтәрләрне реконструкцияләү буенча зур эшләр көтә һәм сусаклагычның саегуына юл куймау буенча планны тормышка ашырырга кирәк. Хәзер әһәмиятле бурычларга игътибарны юнәлтү мөһим. Кадрлардагы үзгәрешләр моңа ярдәм итәр дип ышанам», – дигән ул вакытта Кабец.
Элек Водоканал директоры булыш эшләгән Матафоновны кулга алуның сәбәпләре турында әлегә мәгълүмат юк.
Первоуральск халкы узган елда җәй буе краннан пычрак су агуга зарланды. Кешеләр китерелгән суны алырга чиратка тезелде, шешәдәге су сатып алды. Октябрь башында шәһәр халкын эчә торган су белән тиешенчә тәэмин итмәү сәбәпле, «Ваемсызлык аркасында зур зыян китерү» маддәсе буенча җинаять эше ачылды. Декабрь башында кешеләр кабат сусыз калды. Шуннан соң тагын бер җинаять эше ачыла. 2024 елның гыйнварында Первоуральск суды җирле Водоканал оешмасына туфракка зыян салган өчен дәүләткә 80 миллион сум түләргә мәҗбүр итте.
Алдарак «Новый день» сайты язганча, Первоуральск җәмәгать эшлеклеләренең дә, депутатларның да Водоканал җитәкчесе Артур Гузаировка сораулары бик күп була. Гузаиров моңа кадәр берничә ел (2016 – 2019) Торак-коммуналь хуҗалык, шәһәр хуҗалыгы һәм экология буенча вице-мэр вазифасында эшләгән һәм шул вакытта ук аның эшчәнлеге сораулар тудыра. Мәсәлән, шулай ук, федераль программа буенча Нижний Шайтан буасын төзекләндерү срокларын бозган өчен дә аннан җавап алу кирәк була. Шуннан соң Кабец Гузаировны эштән җибәрә, дөрес, түрәнең үз теләге буенча гариза язуы хәбәр ителә. Шуннан соң ул ике елга Ялтага китә, 2021 елда кире кайта һәм Водоканал директоры вазифасына билгеләнә.
