(Казан, 6 февраль, «Татар-информ»). Ханты-Манси автономияле округы-Юграда «Ак калфак» социаль проектын гамәлгә ашыру кысаларында «Өй остаханәсе» төбәкара иҗади эшләр фестиваль-бәйгесенә нәтиҗә ясалды. Бөтендөнья татар конгрессының матбугат хезмәте хәбәр иткәнчә, бәйге 2021 елның 26 октябреннән 2022 елның 15 гыйнварына кадәр «Стрежевой шәһәр округы балаларга өстәмә белем бирү үзәге» Муниципаль өстәмә белем бирү учреждениесе эш планы буенча узды. «Өй остаханәсе» төбәкара иҗади эшләр фестиваль-бәйгесе татар һәм башкорт халкының декоратив-гамәли сәнгатен яңадан торгызу максатыннан үткәрелә. Дистанцион конкурс «Татар-башкорт бизәкләре белән әвәләп ясау»; «Сәйлән-мәрҗәннәр»; «Оста чигүче һәм тегүче»; «Татар һәм башкорт курчаклары»; «Әбием йомгагы» номинацияләре буенча узды. Фестиваль-бәйгедә Ханты-Манси автономияле округы-Юграның Нягань, Нижневартовск, Нефтеюганск, Покачи, Мегион шәһәрләре, Излучинск һәм Новоаганск шәһәр тибындагы бистәләре, Кемерово өлкәсенең Новокузнецк каласы, Томск һәм Стрежевой шәһәрләре, Пермь краеның Барда һәм Октябрь районы авыллары, шулай ук Татарстанның Алабуга, Чистай шәһәрләре һәм Кукмара, Актаныш районы авылларыннан килгән осталар катнашты. Барлыгы 110 эш тәкъдим ителде. Фестиваль-бәйгедә катнашкан 95 кешенең 47се – балалар, иң яшь катнашучыга – 5, иң өлкәненә 85 яшь иде, диелә хәбәрдә.
