2.728 հալեպահայ ստացել է ՀՀ Նախագահի հանձնարարությամբ Սիրիա ուղարկված մարդասիրական օգնությունը
Հալեպում բնակվող 2 հազար 728 հայ ստացել է ՀՀ Նախագահի հանձնարարությամբ Սիրիա ուղարկված մարդասիրական օգնությունը: «Արմենպրես»-ի հաղորդմամբ, ինչպես տեղեկացնում է Հալեպի «Գանձասար» պարբերականը, այս մասին հայտնել է սիրիահայության շտապօգնության և վերականգնման գործադիր մարմինը:
Գործադիր մարմինը նախապես հաղորդագրություն էր տարածել` ժողովրդին հրավիրելով Ս. Աստվածածին եկեղեցի` ստանալու պատրաստված զամբյուղները: Բնակիչներին տրամադրվել է հանդերձանք, սննդամթերք, ծխախոտ: Օգնության բաշխումը կատարվել է հոկտեմբերի 17-ին, 18-ին, 19-ին, 20-ին և 21-ին:
Օգնության բաշխումը շարունակվում է հայտարարված ժամանակացույցին համաձայն։
Հայաստանի Հանրապետության Նախագահի հանձնարարությամբ Սիրիա ուղարկված մարդասիրական օգնությունը հոկտեմբերի 7-ին հասել էր Հալեպ և հանձնվել սիրիահայության շտապօգնության և վերականգնման մարմնին:
40 տոննա կշռող մարդասիրական օգնությունը նախապես երկու օդանավերով Երևանից տեղափոխվել էին Լաթաքիայի ռուսական Հմեյմիմ ռազմաբազա: Օգնության մի մասը տրամադրվել է Լաթաքիայի,Քեսաբի, Տարտուսի և Դամասկոսի ժողովրդին, իսկ գերակշիռ մասը հասել է Հալեպ` տրամադրվելու բոլոր կարիքավոր սիրիացիներին: