Սփյուռքի նախարարն ընդունել է Մեծի Տանն Կիլիկիո Կաթողիկոսության պատվիրակությանը
ՀՀ սփյուռքի նախարար Հրանուշ Հակոբյանն ընդունել է Հռոմի Սրբազան Քահանայապետ Ֆրանցիսկոս Պապի այցի շրջանակներում Հայաստանում գտնվող Մեծի Տանն Կիլիկիո Կաթողիկոսության պատվիրակությանը՝ Բերիո Թեմի առաջնորդ Շահան արքեպիսկոպոս Սարգիսյանի գլխավորությամբ:
Այս մասին «Արմենպրես»-ին տեղեկացրել են ՀՀ սփյուռքի նախարարության մամուլի եւ հասարակայնության հետ կապերի վարչությունից՝ հավելելով. «Սիրիահայ համայնքի հոգևոր առաջնորդը Սփյուռքի նախարարին փոխանցեց Մեծի Տանն Կիլիկիո Կաթողիկոս Ն.Ս.Օ.Տ.Տ. Արամ Ա-ի օրհնությունն ու բարեմաղթանքները և նշեց, որ իր համար յուրաքանչյուր այցելությունը Հայրենիքի վերելքի ու հաջողության հավատն է ամրապնդում:
Կողմերն անդրադարձան Պապի այցին, այն որակելով որպես պատմական երևույթ, որն ամբողջ աշխարհի ուշադրությունը սևեռելու է Հայաստանին:
Նախարար Հրանուշ Հակոբյանը նշեց, որ Հռոմի Պապի այցը բացառիկ է իր կարգախոսով՝ «Ուխտագնացություն դեպի առաջին քրիստոնյա երկիր» և հավելեց, որ այցը առանձնահատուկ միջազգային հնչեղություն կունենա. քանի որ այն լուսաբանելու համար հավատարմագրվել է 600 լրագրող:
Նախարարը խորին շնորհակալություն է հայտնեց Սփյուռքյան կառույցներին ու կազմակերպություններին, համայնքներին՝ ապրիլյան պատերազմի օրերին և դրանից հետո Հայրենիքի, Արցախի կողքին լինելու համար, այն բարոյական ու նյութական աջակցության, հոգևոր վերազարթոնքի ու միասնականության համար, որ ցուցաբերեց մեր ժողովուրդը:
Կողմերն անդրադարձան Հայաստանում հաստատված սիրիահայերի հիմնախնդիրներին, դրանց լուծման նոր հեռանկարներին և մեկ անգամ ևս շեշտվեց, որ եթե սիրիահայը հեռանում է երկրից՝ նա պետք է ունենա մեկ հասցե՝ Հայաստանի Հանրապետություն»: