Әлмәттә биш айлык сабый өстенә боз төшкән, ул реанимациядә
Әлмәттә биш айлык бала өстенә түбәдән бозлы кар ишелеп төшкән. Ул Казанда ДРКБда нейрохирургия бүлегендә реанимациядә. Бу хакта РФ Тикшерү комитетының Татарстан буенча Тикшерү идарәсе хәбәр итә.
«Әлмәт шәһәрендә Аминов урамындагы торак йортның 10нчы катыннан кар төшү нәтиҗәсендә биш айлык бала зыян күргән, аны әнисе беренче каттагы поликлиникага коляскада алып килгән булган», – диелә хәбәрдә.
Ведомствода билгеләп үтелгәнчә, биш айлык малайның баш миенә зыян килгән.
Монда 33 яшьлек ир-атка да боз төшкән. Аның умыртка баганасына зыян килгән. Бу факт буенча җинаять эше кузгатылган, гаепле дип шикләнгән кеше тоткарланган, тикшерү аны кулга алуны таләп итә.