(Казан, 30 июнь, «Татар-информ», Эльвира Мөхәммәтдинова). Чаллы мэры Наил Мәһдиев Татарстан Президенты Рөстәм Миңнехановның үз адресына Яшьләр көнен бәйрәм итүдә коронавирус чикләүләрен үтәлмәве турындагы кисәтүне гадел дип белдерде. «Мэрга карата искәрмәләр һәрвакыт яңгырый, өстәвенә, барлык дәрәҗәләрдә — халыктан да, югарырак җитәкчелектән дә. Аларны кабул итү, хаталарны төзәтү — мэр эшенең бер өлеше. Әмма бу кулларны төшерергә сәбәп түгел», — диде шәһәр башлыгы журналистларның соравына җавап итеп. Мәһдиев хәбәр иткәнчә, моннан соң шәһәрдә күмәк чаралар уздырганда ковидка каршы таләпләрне үтәүгә җитди игътибар биреләчәк. «Гәрчә бездә барысы да каралган иде — шул исәптән трибуналарда бер урын аша утырту да. Әмма халык бәйрәмнәрне шулкадәр сагыныр һәм озак вакытлы тәнәфестән соң мәйданга шулкадәр күп кеше килер дип көтелмәгән иде», — диде мэр. «Сезгә беркем дә чарага 100 мең кеше килгән очракта социаль дистанцияне ничек сакларга дигән сорауга җавап бирмәячәк. Минемчә, Роспотребнадзор белгечләрендә дә җавап юк. Әмма бу нинди генә катлаулы булса да, чишелеш табарга тырышачакбыз», — дип ышандырды ул. Шул ук вакытта Мәһдиев билгеләп үткәнчә, Татарстан Президенты бәйрәмне оештыру форматы буенча кисәтү ясады, әмма бәйрәмне уздыруны әлегә берәү дә шик астына куймады. «Бәйрәм уңышлы узды, аңа күп көч куелды һәм юкка түгел. Ул якты һәм истә калырлык булды. Әмма хәзер безгә мондый чараларны тагын да куркынычсызрак итү турында уйларга кирәк булачак», — дип йомгаклады шәһәр башлыгы.
