Таклиф кўплигидан жамоа танлашда Бернарду Силванинг боши қотмоқда...
Англия грандларидан бири — "Манчестер Сити" сафида муҳим фигура бўлиб келган Бернарду Силва жорий мавсум якунлангач клуб билан хайрлашишга қарор қилди. Португалиялик плеймейкер бу ҳақда аллақачон ўз позициясини билдирган ва кетишга тайёргарлик кўрмоқда.
Маълум қилинишича, томонлар ўзаро келишувга келган: “Сити” раҳбарияти футболчига шартномани узайтириш бўйича янги таклиф бермайди. Бу эса Силванинг кетиши деярли аниқ эканини англатади.
Ҳозирнинг ўзидаёқ 31 ёшли ярим ҳимоячига Европа клублари жиддий қизиқиш билдирмоқда. Жумладан, "Ювентус", "Барселона", "Бенфика" ва "Галатасарой" каби жамоалар уни ўз сафида кўришни истамоқда. Шу билан бирга, АПЛнинг айрим клублари ҳам вазиятни диққат билан кузатмоқда.
La Gazzetta dello Sport нашри маълумотига кўра, Силванинг ўзи Турин ёки Каталония вариантини афзал кўрмоқда. Яъни, у ёки “Ювентус” ёки “Барселона”ни танлаши эҳтимоли юқори.
Айниқса, “Барселона” португалиялик футболчига анчадан бери қизиқиш билдириб келмоқда. “Ювентус” эса сўнгги вақтларда бу пойгада жиддий рақобатчига айланган. Манбаларга кўра, туринликлар вакиллари футболчининг машҳур агенти Жорже Мендеш билан доимий алоқада бўлиб турибди.
Қисқача айтганда, Бернарду Силванинг кетиши “Манчестер Сити” учун катта йўқотиш бўлиши мумкин. У нафақат техникаси, балки ўйинни бошқариш қобилияти билан ҳам жамоанинг муҳим звеноси эди. Энди эса унинг кейинги манзили қаер бўлиши — трансфер бозорининг энг қизиқ мавзуларидан бирига айланмоқда.