«Олтин тўп» учун асосий фаворит номи маълум қилинди

Дунё футболидаги энг нуфузли совринлардан бири — «Олтин тўп» учун кураш аллақачон қизғин тус олмоқда. Goal нашри 2026 йил учун янгиланган рейтингни тақдим этди ва унда етакчилар ўзгаришсиз қолди.

Рўйхатнинг биринчи поғонасида Ҳарри Кейн жой олган. "Бавария" ҳужумчиси барқарор ўйини ва юқори самарадорлиги билан ҳозирча асосий фаворит сифатида кўрилмоқда. Унинг ортидан жамоадоши Майкл Олисе иккинчи ўринни эгаллаб турибди.

Учинчи поғонага эса Ламин Ямал кўтарилди. "Барселона" вингери ёш бўлишига қарамай, юқори даражадаги ўйини билан эътибор марказида турибди.

Кейинги ўринларда ҳам таниш номлар жой олган: Луис Диас, Эрлинг Холанд, Килиан Мбаппе, Усмон Дембеле, Деклан Райс, Хвича Кварацхелия ҳамда Хулиан Алварес каби юлдузлар кучли ўнликдан ўрин олган.

Қизиқ жиҳати, тажрибали суперюлдузлар ҳам позицияларини яхшилаб олди. Лионел Месси 15-ўриндан 13-поғонага кўтарилган бўлса, Криштиану Роналду 17-ўриндан 14-ўринга кўтарилди.

Маълумот учун, ўтган йил ушбу мукофотни айнан Дембеле қўлга киритган эди ва у ҳозир ҳам даъвогарлар орасида қолмоқда.

Қисқача айтганда, бу рейтинг ҳали якуний қарор эмас, балки йўл харитасига ўхшайди. Мавсум якунигача кўп нарса ўзгариши мумкин — кимдир «учиб чиқади», кимдир эса шовқинсиз пасайиб кетади. Футболда эса интрига ҳали энди бошланди.