Омск өлкәсендә 14 бала экскурсия вакытында газ белән агуланган
Омск өлкәсендә ундүрт бала экскурсия вакытында газ белән агуланган, дип хәбәр итә ТАСС агентлыгы.
Балалар Тара шәһәренең IT-клубына баргач агулана. Бу вакытта ерак түгел генә урнашкан газүткәргечтә ремонт эшләре башкарыла һәм тирә-якка газ тарала. Кайсыдыр мизгелдә балаларның башы әйләнә башлый һәм алар медицина ярдәме сорап мөрәҗәгать итә.
Балаларны һәм аларны озатып йөрүче педагогны тиз арада эвакуацияләгәннәр. Җиде кеше хастаханәгә озатылган. Хәзерге вакытта балаларның тормышына һәм сәламәтлегенә бернинди куркыныч та янамый.
Җинаять эше кузгатылды.