Татарстанда сайлау бюллетеньнәре рус һәм татар телләрендә бастырыла
Татарстан Республикасында барлык дәрәҗәдәге сайлауларда да ике дәүләт теле – рус һәм татар телләре кулланыла. Сайлау бюллетеньнәре һәм мәгълүмати материаллар республикадагы һәр сайлаучы үз сайлау хокукын ирекле һәм уңайлы гамәлгә ашыра алсын өчен ике телдә әзерләнә, дип хәбәр иттеләр ТР Үзәк сайлау комиссиясе матбугат хезмәтендә.
Бүген Татарстанда үзләренең тел һәм мәдәни мирасына сак караган һәр кешене берләштерә торган бәйрәм - Туган тел көнен билгеләп үтәләр. 2026 елда бу дата бөек шагыйрь, публицист, хәзерге татар әдәби теленә нигез салучыларның берсе Габдулла Тукайның тууына 140 ел тулган көнгә туры килә.
«Татарстан сайлау комиссияләре системасы өчен тавыш бирү процедураларыннан тигез файдалануны тәэмин итү гаять мөһим. Республикада сайлауларда рус һәм татар телләрен куллану - ул закон нормасы гына түгел, ә һәр сайлаучыга карата хөрмәт тә. Туган тел көне белән! Туган телгә сак мөнәсәбәттә, бер-береңә карата ихтирамлы булуны һәм республикабызның бай мәдәни традицияләре алга таба да үсүен телим» - дип билгеләп үтте ТР Үзәк сайлау комиссиясе рәисе Андрей Кондратьев.