Самараның «Яктылык» мәктәбендә төгәл фәннәрне татар теле белән бәйләп укыталар
Самара шәһәрендәге «Яктылык» татар мәктәбендә физика һәм химия кебек фәннәрне укыту татар теле белән тыгыз бәйләнештә алып барыла. Бу хакта мәктәпнең татар теле һәм әдәбияты укытучысы Рәхимә Хәерова сөйләде.
«Шуны да билгеләп үтәргә кирәк: безнең мәктәптә башка фәннәрне – физика, математика, химия укыту да татар теле белән тыгыз бәйләнештә алып барыла. Бу алым балаларның фәнни белемнәрен тирәнәйтү белән беррәттән, туган телдә фикерләү күнекмәләрен дә үстерә», – диде ул Казанда узган дөньякүләм «Туган тел» форумының пленар утырышында.
Рәхимә Хәерова «Яктылык» мәктәбен башка белем бирү оешмаларыннан аерып торган үзенчәлек буларак, балалар өчен милли стильдәге мәктәп формалары тегүне әйтте.
«Милли тәрбия нигезен гаилә тәшкил итә. Мәктәп җирен тәртипкә китерү өмәсе, хәйрия акцияләре һәм патриотик чаралар булсынмы – балаларның барысында да ата-аналар җәмгыяте белән тыгыз элемтәдә эшлибез. Әтиләр балаларның шәхес буларак формалашуында аеруча мөһим һәм алыштыргысыз роль уйный. Без гаиләдә дә, җәмгыятьтә дә ир-ат үрнәгенең никадәр мөһим булуын тирәннән аңлыйбыз. Шуңа күрә безнең мәктәптә күп еллар дәвамында «Әтиләр советы» уңышлы эшләп килә», – дип өстәде укытучы.