Чүпрәле җитәкчеләре балаларны бүләкләр белән сөендерү өчен «Теләкләр чыршысы» Бөтенроссия хәйрия акциясенә кушылды. Бу хакта «Туган як» сайтында Гөлия Фәизова яза.
Акциядә Чүпрәле районы башлыгы Марат Гафаров һәм аның урынбасары Алексей Ярухин, Башкарма комитет җитәкчесе Рөстәм Мөхәммәтҗанов, аның урынбасарлары һәм башка җитәкчеләр катнашты.
Район башлыгы Марат Гафаров өч баланың теләген үтәячәк.
«Без барыбыз да могҗизаларга һәм теләкләрнең үтәлүенә ышанабыз. Балаларның Яңа ел теләкләре үтәлергә тиеш», - диде ул.
Хәйрия акциясе Кыш Бабай һәм аның оныгы Кар Кызы белән узды. Аларга кар бабай ярдәм итте.
