Новороссийскида «Кече җир» IV Россия патриотик кино фестивале тәмамланды. Фестивальгә 15 000 артык кеше килгән. Алты көн эчендә 35 фильм (икесе конкурстан тыш) һәм 5 театр куелышы күрсәтелгән. Тулы метражлы фильмнар жюриен режиссер, продюсер Георгий Шенгелия җитәкләгән. Жюри әгъзалары – Россиянең атказанган артисты Владимир Литвинов һәм телевидение алып баручысы Иван Распопов. Бу хакта «Башинформ» мәгълүмат агентлыгы яза.
Мостай Кәрим повесте буенча төшерелгән «Ярлыкау» фильмы тамашачылар симпатиясе бүләгенә ия булды, ә актер Николай Галләмовка лейтенант Янтимер Байназаров роле өчен фестиваль президенты Сергей Новожилов бүләге тапшырылды.
«Бу минем өчен зур горурлык. Фильмыбызны төшерүдә катнашкан һәркемне котлыйм, – дип тәэсирләре белән уртаклашты Николай Галләмов. – Тамашачылар миңа фильмны караганнан соң бу тарихны шул дәрәҗәдә дөрес итеп күрсәткән өчен рәхмәт белдерде, төшерүче төркемгә һәм режиссерга аерым рәхмәт җиткерүемне сорады».
«Ярлыкау» драмасының сюжеты үзәгенә 20 яшьлек сержант-танкист Любомир Зухның тарихы салынган. Язмыш Испан коммунистларының кызы Мария-Терезаны ерак авылга алып килә. Любомир кызга үлеп гашыйк була. Кыз җавап кайтара. «Отбой» командасы яңгырау белән сержант кыз янына очрашуга чаба. Хушлашып, кызны кочаклый һәм яу алдыннан мөһим сүзләр әйтә. Ләкин ул сугыш чоры законнары буенча җинаять кылганын, моның өчен иң каты җәза чарасы янаганын аңламый.
Фильмны Россия Мәдәният министрлыгы һәм Мостай Кәрим исемендәге фонд ярдәме белән «Мотор фильм студия» кинокомпаниясе төшергән. Фильмның продюсерлары – Мостай Кәримнең «Безнең өйнең яме» повесте мотивлары буенча «Сеңелкәш» блокбастерын төшергән Тимербулат Кәримов, Михаил Курбатов һәм Дмитрий Фикс. Картинаның режиссеры – Айнур Әскәров («Отряд таганок», «Буран», «Из Уфы с любовью»). Фильмның сценаристы – Айдар Акманов («Сеңелкәш», «Отряд таганок»).
