Татарстан Рәисе Рөстәм Миңнеханов ТР Дәүләт Советы Рәисе Фәрит Мөхәммәтшинны туган көне белән котлады — бүген Татарстан парламенты спикерына 77 яшь тулды.
«Туган көнегез уңаеннан җылы котлаулар кабул итегез. Сезнең җитәкчелектә республика парламентында, «Бердәм Россия» партиясенең төбәк бүлегендә һәм Татарстан халыклары ассамблеясында алып барыла торган күпкырлы эшчәнлектә уңышлар һәм сәламәтлек телим», — диелә Дәүләт Советы сайтында чыккан котлау адресында.
Рөстәм Миңнеханов билгеләп үткәнчә, Мөхәммәтшинның мондый масштаблы эшкә җәлеп ителүе, бөтен ил масштабында стратегик әһәмияткә ия булган мәсьәләләрне хәл итүдә актив катнашуы сәясәтче һәм җәмәгать эшлеклесенең Татарстанның чәчәк атуы хакына яшәргә һәм армый-талмый эшләргә уникаль сәләтен һәм омтылышларын чагылдыра.