Саба районы Башкарма комитетының мәгариф идарәсе гимназиядә бердәм дәүләт имтиханын уздыру алдыннан бәдрәф ишекләренең өске яртысын кискәннәр дигән мәгълүматны кире какты.
Идарә белгечләре «Татар-информ»га Саба гимназиясенең БДИ уздыру пункты булуын һәм бәдрәф кабиналарындагы ишекләрнең чыннан да алыштырылуын раслады.
«Бу элеккеге зур ишекләрнең боҗралары конструкцияне тотмау һәм ишекләрне еш ремонтларга туры килү сәбәпле эшләнде. Алыштырылган ишекләрнең зурлыгы идәннән алып 1,40 метр тәшкил итә. Бу тиешле гигиена шартларын тәэмин итә», — дип аңлаттылар Саба районы Башкарма комитетының мәгариф идарәсендә.
Элегрәк социаль челтәрләр һәм мессенджерларда Татарстанның Байлар Сабасы бистәсе гимназиясендә БДИ алдыннан бәдрәф ишекләренең өске өлешләрен кискәннәр дигән хәбәрләр тарала башлады. Бу, имештер, балалар кабиналарда күчерә алмасын өчен эшләнгән.
«Интернетта таратылган фотолар чынбарлыкка туры килми, дип хәбәр итәбез. Ишекләр 1,40 метр зурлыкта. Күрәсең, бала нәрсәгәдер баскан, һәм фотога төшергәннәр», — дип билгеләп үттеләр Башкарма комитетта.
«Ишекләрне ремонтлау һәм алыштыру төп дәүләт имтиханы (ОГЭ) һәм бердәм дәүләт имтиханын (БДИ) үткәрүгә бәйле түгел», — дип ышандырдылар район мәгариф идарәсендә.
