Яшь тамашачы театрында, Түбән Камада әле беренче тапкыр гына оештырылган Татар әдәбияты көне кысаларында, язучы, шагыйрь, җәмәгать эшлеклесе, республиканың Г. Тукай исемендәге Дәүләт бүләге иясе Факил Сафинның 70 яшьлек юбилеена багышланган кичә үтте. Бу хакта https://nkamsk-rt.ru сайтында Кол Гали исемендәге милли китапханә хезмәткәре Эльмира Гайнемөхәммәтова яза.
Чарада әдәбиятыбызның күренекле әдипләре: Г. Тукай исемендәге Дәүләт бүләге ияләре Марсель Галиев, Нәбирә Гыйматдинова, Газинур Морат, халкыбызның яраткан шагыйрәсе Шәмсия Җиһангирова, якташыбыз, шагыйрә Альбина Мортазина, Мөслим төбәгеннән килгән кадерле кунаклар — Г. Тукай исемендәге бүләк иясе, халык язучысы Фоат Садриев; А. Алиш премиясе лауреаты, Татарстанның атказанган укытучысы, балалар шагыйре Мөҗәһит Әхмәтҗанов, С. Сөләйманова исемендәге премия лауреаты, популяр җырлар авторы Лилия Садриева, Чаллы каласының өметле яшь шагыйрәләре катнашты.
Фото: © Эльмира Гайнемөхәммәтова
Факил Сафин Мөслим районы Әмәкәй авылында туган. Комсомол секретаре, укытучы, мәдәният йорты җитәкчесе, мәктәп директоры булып эшләгән. 1984 елдан Чаллы каласына күченеп килеп, автозаводта җыючы, бригадир вазифаларын башкарган. Чаллыда нәшер ителүче «Көмеш кыңгырау», «Фән һәм мәктәп», «Мәйдан» басмаларын оештырып, аларны популярлаштыруга күп хезмәт куйган. Боларга өстәп, әдәбият өлкәсендәге эзләнүләрен, бихисап публицистик, тәнкыйть язмаларын, 200дән артык җыр авторы булуын да исәпкә алсак, талантына таң калмалы!
Факил Сафин — калебенә шигырь орлыгы салынган күп кенә егет-кызга Шигърият дигән олы юлга чыгарга хәерфатиха биргән, иңнәренә канат куйган кеше дә. Кичәгә шуларның бер төркеме Факил абыйларын котларга, аңа булган рәхмәтләрен җиткерергә килгән иде. Шагыйрәләр Лилия Гыйбадуллина, Айзирә Имамова, алар командасына Түбән Камадан кушылган яшь иҗатчылар Алия Зартдинова белән Айдар Нуриев чыгышын тамашачы көчле алкышларга күмде.
Талантлы якташларын сәхнәдән Мөслим делегациясе дә котлады. Алар юбилей чараларының йомгаклау өлеше әдипнең туган ягында көз айларында уздырыласын, оештыру эшләренең инде бүгеннән үк башлануын әйтте.
Казан язучылары Факил Сафинны 90нчы еллардан бүгенгә кадәр без яшәгән дәвер хакында иң күп язган автор, ягъни бүгенге көн язучысы дип атады. «Әдәби марафон» рейтинглары буенча да иң алдынгылар рәтендә ул. Әдәбиятка кагылышлы фәнни-гамәли конференцияләрдә, әдәбият галимнәренең мәкаләләрендә исеме бик еш күренә. Әдипкә, соңгы елларның иң күп укылган авторларның берсе, дип югары бәя бирделәр.
Чара Факил Сафин иҗат иткән җырлар белән үрелеп барды. Чаллы талантлары Илсөяр Зарипова, Дания Сибгатуллина, шәһәрнең күренекле җырчылары Илһам Хисмәтуллин, Рөстәм Мортазин чыгышлары бәйрәмне тагын да ямьләндереп җибәрде.
«Кичә бер тында үтте. Монда, билгеле инде, чараны алып баручыларның да өлеше зур булуы бәхәссез. Ә алар — Кол Гали исемендәге милли китапханә мөдире Гүзәлия Гыйбадуллина белән «Илһам» эстрада ансамбле җырчысы Илшат Хәбибуллин. Бәйрәм чарасын югары дәрәҗәдә оештырган шәһәр мәдәният идарәсе, Түбән Кама китапханәләр берләшмәсенә әдәбият сөючеләр исеменнән олуг рәхмәтебезне ирештерәбез һәм мондый эчтәлекле, күңелгә үтеп керә торган чаралар алга таба ешрак оештырылыр дигән теләктә калабыз», диелгән хәбәрдә.
Фото: © Эльмира Гайнемөхәммәтова
