Казан мэры Илсур Метшин Бөек Ватан сугышы ветераны 96 яшьлек казанлы Александр Шахназаров һәм аның хатыны Людмиланы якынлашып килүче Җиңү көне белән котлады. Бу турыда Казан мэриясе хәбәр итте.
«Без сезне күптәннән беләбез. Сезне Суворов училищесында хезмәт иткән вакыттан хәтерлим, сез ветераннар чараларына килә идегез. Шуннан бирле сез яшьләргә патриотик тәрбия бирү өчен бик күп эш башкарасыз. Безнең өчен сез һәм сезнең гаилә үрнәк булып тора. Сезнең белән шәхсән очрашу күңелле», - диде Метшин, ветераннарга мөрәҗәгать итеп.
Татарстан башкаласы мэры ветеранга сәламәтлек һәм озын гомер, ким дигәндә 105 яшькә кадәр яшәвен теләде. Сүз уңаеннан, Шахназаровның бабасы шул яшькә җиткән.
96 яшьлек ветеран Метшинга игътибар, кайгырту һәм бүләкләр өчен рәхмәт белдерде һәм шәһәр башлыгы белән Җиңү парадында очрашуларны әлегә кадәр хәтерләвен әйтте.
«Укучым Валерий Герасимов килгәнен искә төшерәм, ул вакытта Рөстәм Нургалиевич, аннары мин чыгыш ясадым. Ул вакытта үз чыгышымда, Герасимов - минем укучым, илебезнең горурлыгы, Казанның мактаулы гражданины, дип билгеләп үттем. Мин сөйләп бетергәч, сез минем янга килдегез һәм кулымны кыстыгыз», - дип искә төшерә Шахназаров.
Метшин Шахназаровлар гаиләсен Казанда булачак Җиңү парадына чакырды.
Искәртик, Татарстан Республикасы башкаласында барлыгы 3230 инвалид, тыл хезмәтчәне һәм тол хатын яши, шуларның 172се сугышта катнашучылар.
